شير في الخير... بقلم يمنى فتحي

تفتكروا العالم ممكن يتغير بالشير الكتير للسلبيات بغرض التوعية و الانتقاد؟

تفتكروا إن كل لما مشكلة جديدة تظهر و تنتشر و تبقى منتشرة في كل حاجة حوالينا انتوا كدة بتحاولوا تقضوا عليها و تشوفلها حل !! انتوا مقتنعين ان ديه أسرع طريقة ان المشكلة ديه تختفي!! انتوا مدركين ان كدة بتنتشر اسرع !! يعتبر تنبيه للناس ان في حاجة غلط !! كدة بتظهر للاضواء ... بتعرّفوا الناس ان في حد قدر يعمل كدة فعلا و ممكن يتشجّعوا !! بتعرّفوهم ان الناس عادي ممكن تعمل أفعال كبيرة جدااا و هيّا فخورة!! لما المشاكل بتنتشر بيبقى صعب جدااا تختفي بتبقى ظاهرة للكل بوضووح و بيبقى اصعب ان الواحد يواجهها..... و اساسا ممكن حد يتأذى بسبب الشير اللي عملته ! و ممكن لما يفكر يعدِّل من نفسه هيقول انا هتفرق معايا ايه ما الناس معتبراني زي ما انا شخص سئ و عمره ما هيفكّر يتغير يبقى كدة استفاد ايه؟

ده اكبر حاجة غلط احنا بنعملها.. مظنش أن ده كدة توعية ... التوعية مش بتبقى الانتقاد الكتير و الكوميكس لا خالص ! ... مش لما أم بتيجي تعاقب ابنها عشان عمل حاجة غلط لازم تعاقبه بينها و بين نفسها هما بس لوحدهم ! عشان ثقته بنفسه متتهزش و ميتحرجش !

نفس الموضوع لما حد يعمل حاجة و هيه فعلا غلط كبير و تيجي السوشال ميديا تتكفل بشهرته ف هو حاجة من اتنين يا أما هيحس انه بقى مشهور و وصل للي عاوزه "و ساعات بيكون مراده " يا اما كدة هيحس ان الناس قللت من مشكلته و سخرت منها و انه ملوش لازمة ف يبقى اسوء .

اساسا هتلاقي اكتر فئة مهتمة باللي بيحصل على السوشال ميديا هما الشباب .... هما اللي مهتمين بكل المواضيع ديه و يعتبر واخدين الموضوع عادي هزار ... هما كمان اللي بيعملوا شير و بينتقدوا و بيعملوا كل الليلة ديه ... و هم مش في موقف يأهلهم لكده اساسا معندهمش المعلومات الكافيه انهم يحلّلوا و يحرموا و ينقدوا .... هما مجرد شباب اساسا لسة بيكتشفوا كل حاجة جديدة عشان يستمتعوا ...

;بس فكرت ان ممكن الشير بتاعك يثير فضوله و عاوزة يجرب اللي انت بتنقده !! ممكن تلعب في دماغه و لا قدر الله ممكن ينحرف ،،، يغضب على اهله ،،، يلحد ،،، او حتى ينتحر ؟ انت حطيت الاحتمالات ديه كلها قدامك قبل ما تعمل شير لمشكلة ؟ و فكرت كويس ديه نتايجها سلبية ولا ايجابية .؟

هو اه ربنا امر بالامر بالمعروف و النهي عن المنكر بس احنا بنتبع اساليب غلط في كدة اساسا ،

لان المشاكل مش بتتحل لما بتكبر هيه بتزيد سوءاً المشكلة عشان تتحل لازم تبقى صغيرة و محدش عارفها عشان تعرف تسيطر عليها و عشان صاحب المشكلة لما يصلّح من نفسه بعدين و يكتشف انه كان غلط ميحسش بالاحراج الشديد ان كل الناس عارفه هو عمل ايه ،،، عاوز تنصحه انصحه مش هيحصل حاجة جايز ربنا يهديه على ايدك ، كمان لو عاوز تنشر مشكلته و تفكر الناس ان ده غلط الاحسن يبقى بعد ما يتعدل عشان هما يبقوا فاهمين كويس فين الصح و فين الغلط .

انا مش ضد الشير و أن احنا المفروض نبقى عارفين المعلومات كلها و فاهمين اللي بيحصل حولينا كويس ، بس في حدود ... في حدود يا جماعة المفروض نلتزمها و نعرف ان في حاجات الافضل نداري عليها .